Anudia—
pamatia
king tinagoan
sa akong dughan,
(ayaw katingala
nga ikaw day akong tug-anan
kay di ko buot nga sila
ug ang kalibotan masayod niini).
Anudia—
nakaplagan ko na
ang mutya sa akong damgo
ug nasuta ko gayod nga
hingpit nga maanyag—
hulad sa
(ang iyang mga mata malulot
diin gisulat ang kadalisay
sa iyang kalag – ug sa
pamarog niyang nindot pagkalalik
igo nang pasalig nga ako magmalipayon
kon siyay maako).
Apan, pasayloa ako, Anudia
nga ikaw kini:
ang mutya nga nasalom ko
sa kalawran sa gugma—
(ug karon: ania ako andam
pagdawat sa imong isilot!)
Ning atong kalibotan
Nga inaptan sa
Dunay duruha ka mga Bathala:
Bathalang Langitnon,
Bathalang Kalibotanon.
Ang imong Bathala,
Daghan di motan-aw
Bisan sila nakakita;
Nagpakabungol bisan nakadungog
Sa mga Pulong sa Isang gisangyaw.
Ang ikaduhang Bathala,
Daghang gapiyong sa mga mata
Bisan sulad ang gidulngan;
Giulipon ang kaugalingon
Sa mga pangandoy’ng lawasnong:
Kahangol sa bahandi,
Panlupig sa mga gagmay,
Pagyatak sa mga mahuyang---
Mga dagko ray nagpakabulahan.
Alaot, o, alaot nga mga tawo….!
Ila ang kalimot karon;
Ugma ang ulahing pagkaamgo
Nga may tinuod nga Bathala
Kanila maningil ug manudya!
gimingaw ako sa mga buntag
sa among balangay sa Abaling;
usab gimingaw ako sa mga huni
sa kalanggaman nga magmaya
inig-abot sa kabuntagon
nga magasapot sa masanagong Adlaw.
gimingaw ako sa mga buntag nangagi
nga misubang sa among balangay kanhi,
kay mao kadtoy anib nga malipayon
sa akong kabatan-on uban kang rita,
ang kabata ko nga natingban
sa tim-os nga paghigugma!
ang mga buntag kanhi nga nanglabay
gihatagan ug bulok ni rita
sa iyang dugamisnong pahiyom
ug sa iyang luming laylay—
nga naghubit sa pagbating salingtuod
sa gugmang banikanhon!
apan dili ko na kadto hipalgan
nga mga buntaga bisan kanus-a
sanglit hagbay nang misalop
didto sa kasadpan sa kalimot
sa dihang mitaliwan ang pinangga kong rita
ngadto sa sabakan sa dakbayan!…
Hangtod sa tumoy sa imong Damgo
Paaboton ko ikaw
Sa tibuok nga pagbalaan
Sa mga saad ta;
Bisan pa nga ang mga bituon sa langit
Mangatagak tanan sa akong dughan
Ug ang mga kabulakan usab maako na
Ug akoa ra gayod—
Akoy mabihag dili bisan kanus-a
Tungod kay gimahal ko ikaw
Sa tibuok kong kinabuhi—
Busa paaboton ko ikaw hangtod kanus-a
Sa imong pagbalik, Pinangga!
Ug kon ugaling mapakyas man
Ang atong panumpa
Sa gahom ni Pagbudhi:
Hinumdomi nga mahalon ko ikaw
sa kanunay,
Handomon sa tanang mga gutling—
O! paaboton ko ikaw, Rita!
Sa balaknong tanaman sa kinabuhi,
Nakita ko ikaw,
O, Bulak nga matahom,
Nahanggap ko ang kahumot
Sa alimyon sa imong gihay
Nga mibuklad sa kabuntagon.
Sa busay sa sulolbarong damgo
Nakita ko ikawng naligo,
Naglaylay sa gugmahanong saloma;
Buot ko untang maghubog pagsud-ong
Sa malamaton mong katahom,
Apan… ay, nawala ka lang dayon!
Sa panahon sa tingpamulak
Mibuklad ka sa katahom,
Nakig-indig sa mga bulak….
Buot ko untang kutloon ang imong gihay
Ug pagahagkan sa makadaghan,
Apan naulaw, nahadlok ako.
Ug nagpabilin ka sa pungango –
Sa ting-init,
Sa tingpamulak…
Apan kutob lang gihapon ko sa pagsud-ong:
Wa ko ikasumbong
Ang pagbating natan-og ning dughan!
Rosenda
Kausa ug mao lang kadto nga higayon
Ikaw mikunsad kanako
Apan ngano bang wa dayon ako makasabot
Nga ikaw diay naghalad na unta sa gugma mo
Sa duyanan sa talagsaong yugto sa panaghibalag ta?
Sa dihang mitigsapong na ako sa kalinghod
Diha pa ako makaamgo sa dakoang kahinugon
Sa napasagdang kopa sa paghigugma
Nga diha na unta sa ngilit sa pagpahimulos
Sahi sa atong pagpangaligo sa baybayon sa Punta Cruz.
Dili lang makausa kondili makadaghan gayod
Gisulayan ko ang pagbanhaw sa maong kahigayonan
Pinaagi sa pagbugtaw sa imong mga tunob
Apan bisan giunsa ko na lang ikaw pagsuhid
Namino gayod ako sa napadparan mong lapyahan.
Rosenda, ikaw ang rosas nga nalarag;
Ikaw usab ang bituon nga naawop ug balak nga nahanaw
Sa
Bisan pag hulaton ko ang tanang mga banagbanag
Sa nanghiblin kong mga Adlaw sa maas kong kinabuhi.
Maulaw unta ako moangkon, Rosenda
Nga niining gabii sa akong paghandom kanimo
Nagdanguyngoy ako sa tumang kamingaw ug kawili
Sa nayabong dugamis nga gidulot na unta
(Alang kang OVJ)
Malaksot ang dagway sa kamingaw
Kon ang maong pagbati
Anha mogitib sa kasingkasing
Sa binuhat nga nahilayo
Sa mutya sa iyang kinabuhi.
Gimingaw ako sa imong pagbiya
Nagsubo ako karon kay imong gitalikdan.
Hangtod kanus-a kita maghibalag pag-usab
King nagum-os kong dughan
Dili gayod bation sa kalipay
Kay ikaw da gayod ang makabanhaw
Sa patay kong mga himaya!
Tapos na ang bugtiay sa kanhiay
Ugpas na ang kapanahonan ni Datu Puti
Mao upod ang abhong mga adlaw ni Limahong
Mibanos na ang kuwartahay hinarian sa Euro
Ug uban pang binag-ong sikapat sahi sa Lapad
Haskan gyong lisora kon walay sulod ang bolsa
Bisan hiyos Monay higante sa mga mata.
Halos tanang lihok sa tawo gipasikad nas atik
Kuwarta diri, kuwarta didto—hangtod minteryo
Sa walay nahot sapi gayoy gibugtaw
Sa tanang gutlo maadlaw o magabii
Sa mga buta kuwarta gimanggad bisan di makita
Apan ang mga adunahan di gyod lud-on og kuwarta
Mora silag sako nga di mabusog sa kahangtoran.
Sa buot madato nga linaktod sa yawa makigbakas
Gamiton kusog, kabangis, trampas ug panikas
Alang kanila way bili katungod o kinabuhi sa uban
Makab-ot lang tumong sa kahakog : Gahom ug Bulawan!
Apan dili baya daotan ang kuwarta
Ang naghingaping gugma sa salapi
Maoy pagpaulipon nga dili maayo
Kay molanag sa dugokan, molaglag sa kalag.
Usa sa mga pagtulun-an sa Balaang Kasulatan
Ang bahad mahitungod sa pagtumpi og bahandi
Ilabi na gayod pagtukod mga mansiyon sa yuta
Sanglit huyang sila batok sa hamok
Sa anay, bukbok, taya ug ilaga sa tanang takna.
Atua sa Langit ang tinuod nga Alampoanan
Dili ang bathala sa binultong bulawan sa Diwalwal
Kay Siya mao ang Sinugdanan ug Kahangtoran
Atua usab didto ang mga gambalay nga dumalayon
Ug gingharian sa kinabuhing balaanon.